අන්තර්ජාලය යනු කුමක් ද ?
අන්තර්ජාලය පිළිබඳව විවිධ උගතුන් විසින් විවිධාකාරයෙන් නිර්වචනය කර ඇත. අන්තර්ජාලය යන වචනය සෑදී ඇත්තේ ඉන්ටර් කනෙක්ටඞ් නෙට්වර්ක් යන්න කෙටි වීමෙනි. ලෝකප‍්‍රකට වෙබ්ස්ටර් ශබ්දකෝශය දක්වන පරිදි අන්තර්ජාලය යනු, කුඩා ව්‍යාපාරික, අධ්‍යාපනික, රාජ්‍යමය ජාලයන්ගෙන් සෑදුන විශාල පරිගණක ජාලයක් වෙයි. එසේම අන්තර්ජාලය යනු පරිගණක ජාල, පරිගණක වැඩසටහන්, තොරතුරු හා ඒවා භාවිත කරන අය යන කොටස් වල එකතුවයි. එය තවත් එක් නිර්වචනයකි. අන්තර්ජාලය යනු කුමක්දැයි විස්තර කරන සයිබර් වෙබ් අඩවිය අන්තර්ජලයේ මූලික ලක්‍ෂණ 09 ක් පෙන්වා දෙයි. එනම්,
- මාධ්‍ය ජාලයක එකමුතුවකි
- අධ්‍යාපනික හා මූලාශ‍්‍ර සාගරයකි
- විනෝදයට හා සතුටට මගකි
- ලොව වටා සිටින ඔබේ මිතරු මිතුරියන්ට කථා කිරීමට මගකි
- ව්‍යාපාරික හා අධ්‍යාපනික නිබන්ධනයකට හෝ පර්යේෂණයකට තෝතැන්නකි
- දුකට කරදරයට පිහිටකි
- වෘත්තීයමය වශයෙන් අත්දැකීම් බෙදා හදා ගත හැකි තැනකි
- ලේඛන හා පුස්තකාල සේවා සපයන්නකි
- අපගේ මෙන්ම අපගේ දරුවන්ගේ ද අනාගතය සුරකින්නකි
අන්තර්ජාලය යනු ජනමාධ්‍යයක් නොවේ. ජනමධ්‍ය වාහකයකි. වර්තමානයේ සෑම ජනමාධ්‍යයකම පාහේ වේගවත්ම වාහකයා වී සිටින්නේ අන්තර්ජාලයයි. පුවත්පත, ගුවන් විදුලිය, රූපවාහිනිය යන සෑම මාධ්‍යයකටම මෙය පොදු තත්ත්වයකි. උදෑසන අවදිවී තම පරිගනකය අසල වාඩිගත් සැනින් බොත්තම තද කල පසු ලොව ඕනෑම පුවත්පතක් කියවීමේ අවස්ථාව ද ලොව ඕනෑම නාලිකාවක් නැරඹීමේ අවස්ථාව ද ගුවන් විදුලියකට සවන්දීමේ අවස්ථාව ද අන්තර්ජාලය නිසා හිමි වෙයි.
අන්තර්ජාලය නිසා අද වන විට ජනමාධ්‍ය පෞද්ගලික මාධ්‍යයක් බවටම පත්ව තිබෙයි. ජීවත්වීමට අවශ්‍ය සියලූම භාණ්ඩ හා සේවා අන්තර්ජාලයෙන් ඇණවුම් කරගත හැකි තත්ත්වයක් මත සියලූම අධ්‍යාපනික හා ව්‍යාපාරික කටයුතු අන්තර්ජාලය ඔස්සේ සිදු කරගත හැකි තත්ත්වයක් තුල මෙය වැළැක්විය නොහැකි තත්ත්වයක් බවට පත්ව තිබෙයි. අන්තර්ජාලයට පාලකයෙක් නැත. එය නිදහසේ තොරතරු ගලා යන මාධ්‍යයකි. එබැවින් ලොව ඕනෑම පුද්ගලයකුට රටකට හෝ සංවිධානයකට ඒ සඳහා තොරතුරු එක් කළ හැකිය. තම ස්වාධීන මතය ඒ ඔස්සේ ලෝකය පුරා ව්‍යාප්ත කළ හැකිය. එය අන්තර්ජාලයට පමනක් සුවිශේෂී කාරණාවකි.
සටහන :- අමිල නුවන් මධුසංඛ
No comments:
Post a Comment