ජනප‍්‍රිය සංස්කෘතිය යනු
ජනප‍්‍රිය සංස්කෘතිය යන්න කිමැයි හදුනා ගැනීමට පෙර සංස්කෘතිය යන්න කුමක්දැයි හදුනා ගත යුතු වේ. සංස්කෘතිය යන්න ද එක් නිශ්චිත සීමාවකලා විග‍්‍රහ කළ නොහැකි වේ. විවිධ විචාරකයෝ විවිධ නිර්වචන ඔස්සේ එකී විෂය විග‍්‍රහ කරති. එකී නිර්වචන අතර පෞරාණික නිර්වචනය ලෙස 1871 දී ඊ. බී. ටයිලර් නැමැති සමාජ මානව විද්‍යාඥයා විසින් ඉදිරිපත් කළ නිර්වචනය හදුනාගත හැකි වේ. ඔහුට අනුව සංස්කෘතිය නම්,
දැනුම ඇදහිලි කලා නීති සදාචාර සිරිත් විරිත් හා මිනිසා සමාජයේ ජිවත් වන පුද්ගලයෙකු වශයෙන් ලබා ගත්තා වූ පුරුදු පුහුණු හා හැකියාවන් අඩංගු සංකීර්ණ සමස්තයයි.
මේ නිර්වචනය තුළ පුද්ගලයගේ සමස්ත හැසිරීමේ රටාවම සංස්කෘතිය වශයෙන් හදුනාගත හැකි වේ. සමහරු සංස්කෘතිය යන්න ගුණ වගාව නමින් ද, ආගම සාහිත්‍යය ඉගැන්වීමෙන් හා සාහිත්‍ය කලාස්වාදයෙන් ලැබෙන චිත්ත විසුද්ධිය නමින් ද හදුන්වති.
මේ ආකාරයට හදුනා ගන්නා සංස්කෘතිය අද වන විට ඉතා පුළුල් විෂය ක්‍ෂේත‍්‍රයක් ඔස්සේ ව්‍යාප්තව ගොස් ඇති අතර බොහෝ වෙනස් වීම් වලටද භාජනය වී තිබේ. මෙම වෙනස්වීම් වලට බලපෑ සාධක අතර කාර්මික විප්ලවය මෙන්ම ජනමාධ්‍ය බිහිවීම ද හේතු වේ.
මිනිසා තුළ පුදුම එළවන මෙම ජනමාධ්‍ය මගින් මෙතුවක් කල් පවත්නා සම්මත නිර්මාණ ක‍්‍රමවේදයන් ඉක්මවා නව නිර්මාණ, නව තාක්ෂණික ක‍්‍රමවේදයන් ඔස්සේ විකාශය විය. එය කෙටිකතාව නවකතාව නාට්‍ය ගීතය මෙන්ම දෘශ්‍ය මාධ්‍යය ද නව මුහුණුවරකට පරිවර්ථනය වන්නට හේතු විය. මේ පසුබිම සම්මත නිර්මාණ ශිල්පියා අසම්මත ආකාරයකට නිර්මාණ බිහිකරන ශිල්පීන් බවට පත් විය. ජනමාධ්‍යය ලොවම ආවරණය කළ විට තත්කාලයේ තිබූ සංස්කෘතියට ජනප‍්‍රිය අංග එකතුවීමෙන් නව සංස්කෘතියක් ද බිහි විය. ජනප‍්‍රිය සංස්කෘතිය ලෙස හදුනාගත හැක්කේ සංස්කෘතික ව්‍යාප්තියේ ප‍්‍රතිඵල ලෙස බිහි වූ නව ආරක් ගත් ජන සංස්කෘතික අංගයන්මය. ඒ අනුව ජනප‍්‍රිය සංස්කෘතිය යන වචනය භාවිතයට පැමිණෙනුයේ 1950- 1960 වැනි දශකවලදී වේ. මේ පිළිබඳව විවිධ පර්යේෂණ සිදු කරමින් බොහෝ විද්වතුන් විසින් විවිධාකාර වූ අර්ථකථනයන් ජනප‍්‍රිය සංස්කෘතිය යන්න පිළිබඳව ඉදිරිපත් කර තිබේ.
- ජනප‍්‍රිය සංස්කෘතිය යන්න වඩා බහුතර ජනතාවගේ සංස්කෘතිය වේ -නූතන කලා විචාරකයන්-
- ජනප‍්‍රිය සංස්කෘතිය යනු සමාජය තුළ ජිවත්වන සියලූ දෙනාගේම සංස්කෘතියයි -බටහිර විචාරකයින්-
- මිනිස් කණ්ඩායමක අත්දැකීම් බෙදා හදා ගන්නා ක‍්‍රමය ජනප‍්‍රියසංස්කෘතිය නම් වේ -හිදෙතොෂී කාටෝ-
මේ ආකාරයට විවිධාකාර ලෙසින් හදුනාගන්නා ජනප‍්‍රිය සංස්කෘතිය ජනයා විසින් නිර්මාණය කරන ලද්දක් ද, ජනමාධ්‍යය වල නිර්මිතයක් ද යන්න නිසැකව නිර්වචනය කළ නොහැක්කේ හැම විටම එය එකිනෙකට වෙනස්ව අන්තර් වශයෙන් පෝෂණය වන බැවිනි.
අමිල නුවන් මධුසංඛ
