නව යොවුන්වියට තහංචි...
වර්තමානයේ යොවුන්විය පිළිබඳව කථාකරන විට එය විවිද කෝණයන්ගෙන් යුක්ත බව පෙනීයයි. යොවුන් වියට පා තැබීමත් ඔවුන්ගේ ආකල්පමය චින්තනයත් සමාජය ඔවුන් දෙස බලන ආකාරයත් වැඩිහිටියන් හා සමවයසේ යහලූ යෙහෙළියන් ඔවුන් පිළිබඳව දරන විග‍්‍රහයත් ආදී විවිද පැතිකඩයන්ගෙන් යොවුන් විය පිළිබඳව සාකච්ජා කළ හැකිය. එපමනක් නොව යොවුන් වියේ ආරම්භය සහ අවසානය කොතැනක පවතීද යන්න පිළිබඳව ද මතබේදයන් පවතියි. කෙසේ නමුත් ජිව විද්‍යාත්මක ආරම්භයක් සහ සංස්කෘතික අවසානයක් යොවුන් වියට පවතින බව අවසානයේ පෙන්වා දී තිබෙයි.
යෞවනය පිළිබඳව කුමන කතිකාවත් ගොඩනැගුන ද යොවුන් වියේ වර්තමාන තත්ත්වය පිළිබඳව මගහරිමින් කථා කිරීම එතරම් සාර්තක නැත. එසේනම් යොවුන්විය යනු හුදෙක්ම සරළ ජිව විද්‍යාත්මක ක‍්‍රියාවලියකට වඩා සංකීර්ණ මනෝවිද්‍යාත්මක සහ සමාජ විද්‍යාත්මක ක‍්‍රියාවලියක සාමූහික ප‍්‍රතිඵලයක් ලෙස අර්ත දැක්වීම වඩාත්ම ප‍්‍රතිපලදායකය. නිවස පාසැල හා සමාජය යන ස්ථාන තුනකම එක්වර හැසිරෙන නව යෞවනය වෙත විවිදාකාරයේ අවවාද සහ උපදෙස් අසන්නට දකින්නට ලැබීම ස්වභාවිකය. කළ යුත්ත කුමක් ද නොකළ යුත්ත කුමක් ද යන්න තෝරා ගැනීමට පවා අපහසු වන තරමටම මගපෙන්වීම් ලැබෙයි.
සමහර විටෙක පාසැල තුලින් කළ යුතුයැයි සඳහන් කරන ඇතැම් යහපත් ක‍්‍රියාකාරකම් නිවසේදී නොකළ යුතු ක‍්‍රියා ලෙස ප‍්‍රතික්ක්‍ෂේප විය හැකිය. මේ සියළු ආදර්ශ උපදෙස් සහ යෝජනා වලට විවෘත්ත වන නව යෞවනය කළ යුත්තේ කුමක්දැයි තේරුම්ගත නොහැකිව අන්දමන්ද වන අවස්ථාද නැතිවා නොවේ. ළමාවියේ කෙළිදෙළෙන් විනෝදයෙන් ගස් උඩින් පනිමින් ගගේ පීනමින් එකට රන්ඩු කරමින් පිරිමි ළමුන් සමග ගතකරන ගැහැණු ළමුන්ට හදිසියේම එක් දිනයකදී ඒ සියල්ල තහනම් කරනු ලබයි. අවම වශයෙන් නිවසෙන් එළියට බැසීමටවත් පිරිමි ළමයකු සමග කතාබහ කිරීමටවත් පිරිමියකු දෙස බැලීමටවත් අවකාශයක් නොදෙයි. තවත් දින කිහිපයකින් තමන් කරන කරන දෙයට තහංචි වැටෙයි.
”ඔහොම නටනවද ගෑනු ළමයි උඹට ලැජ්ජ නැද්ද කොල්ලන්ගෙ කරේ එල්ලිලා නටන්න”
”ඔය විදියට දගලන්න එපා දරුවො”
”උඩ පනින්න එපා... ගහගන්න එපා...”
”එපා.. එපා.. එපා.. හැමදේම එපා..”
මේ අයුරින් තහංචි වල අවසානයක් නැත. පාසැලේදී පිරිමි ළමුන් සමඟ සෙල්ලම් කළ යුතුයැයි වැඩ කළ යුතු යැයි ගුරුවරුන් විසින් පවසන විට නිවසින් මේ සියල්ලට තහංචි පනවයි. මේ සියල්ල එකවර දරාගත නොහැකිව කළ යුත්ත නොකළ යුත්ත තෝරා ගැනීමට නොහැකිව සිත් තැවුලට පත් වන යෞවනියෝ අසහනකාරී තත්ත්වයන්ටද මුහුණ දෙති. මේ සියල්ල දෙස නොයිවසිල්ලෙන් බලා සිටින යෞවනයෝද තරමක කැළඹිලි ස්වභාවයකට පත් වෙයි. මන්ද යත් මෙතෙක් කලක් තමන් සමග එකට ගත කළ ගැහැණු ළමුන් ඔවුන්ගෙන් ඈත් කිරීම ඔවුන්ට ප‍්‍රශ්නකාරී වීමයි. මෙයට හේතු සොයන යෞවනයන්ද විවිධාකාර ගැටලූ වලට මුහුණ දෙති. මෙම සිදුවීම් අඩු වැඩි වශයෙන් වර්තමානයේත් අතීතය පුරාවටත් අනාගතයේත් මෙලෙසින්ම සිදුවනු ඇත. නමුත් තහංචිය තුලද දැකගත හැක්කේ කුතුහළයකි. එබැවින් විමසිලිමත් යොවුන් විය මෙම තහංචි ඉක්මවා යෑමටත් ඒවා අත්හදා බැලීමටත් නිරන්තරයෙන්ම උත්සාහ කරති. ඒ නිසා කළ යුතු වන්නේ දඟකාර තාරුණ්‍යයට මේ පිළිබඳව කාරුණික අන්දමින් වටහා දීමයි. එය සියල්ලටම වඩා යහපත් වනු ඇත.
සටහන :- අමිල නුවන් මධුසංඛ 
No comments:
Post a Comment